Өрхийн эрүүл мэндийн төвийн ахлах сувилагч нарын “Өрхийн эрүүл мэндийн төвийн сувилахуйн тусламж, үйлчилгээний шинэчлэл, сэргэлт” улсын зөвлөгөөн Арвайхээр суманд зохион байгуулагдаж байна.

Эрүүл мэндийн яам, Монголын өрхийн анагаах ухааны мэргэжилтнүүдийн холбоо, Өвөрхангай аймгийн Засаг даргын тамгын газар, Эрүүл мэндийн газар, “Уян сэтгэл” өрхийн эрүүл мэндийн төв хамтран зохион байгуулж буй уг зөвлөгөөнд 21 аймаг, нийслэлийн 9 дүүргийн өрхийн эрүүл мэндийн төвийн дарга, ахлах сувилагч нарын төлөөлөл 200 гаруй хүн оролцож байгаа юм.

Зөвлөгөөнөөр эрүүл мэндийн анхан шатны тусламж үйлчилгээний талаарх бодлогын хэрэгжилт, цаашид авч хэрэгжүүлэх арга хэмжээ, өрхийн сувилахуйн дэлхийн чиг хандлага, хөгжлийн талаар мэдээлэл өгч, монголын өрхийн сувилахуйн тусламж үйлчилгээний өнөөгийн байдал, тулгамдаж буй асуудал, шийдвэрлэх арга замын талаар санал бодлоо солилцлоо.

Зөвлөгөөн маргааш улсдаа анх удаа ISO 9001:2015 Олон улсын чанарын стандарт хангасан Улсын тэргүүний “Уян сэтгэл” өрхийн эрүүл мэндийн төвийн сувилахуйн тусламж үйлчилгээний туршлага судлах үйл ажиллагаагаар үргэлжлэх юм.