Хуралд аймгийн иргэдийн Төлөөлөгчдийн Хурлын дарга Т.Нарангарав, Засаг дарга бөгөөд Батлан хамгаалах газрын дарга О.Пүрэвдорж, болон хууль, цэрэг хүчний байгууллагын удирдлагууд оролцов.

 

Баярын хуралд аймгийн Засаг дарга мэндчилгээ дэвшүүлж, "Зэвсэгт хүчний түүх бол монголын тусгаар тогтнолын түүхтэй салшгүй холбоотой. Өвөрхангай аймгаас 1939 оны Халхын голын дайн, 1945 оны Чөлөөлөх дайн, 1940-1948 оны баруун хязгаарын зэвсэгт тулгаралтад давхардсан тоогоор 4 мянга гаруй цэрэг эрс оролцон халуун амь, бүлээн цусаараа улс орныхоо бүрэн эрхийг баталгаажуулж байсан түүхтэй.

Баатарлагаар тэмцэн бахдам гавьяа байгуулсан олон аавын хүү төрийн дээд одон, медалиар шагнуулсны дотор Өвөрхангай аймгийн Төгрөг сумын харьяат Лувсанцэрэнгийн Аюуш нь БНМАУ-ын баатар цолоор шагнагдсаныг баярын энэ өдөр эргэн дурсан, хүн бүр бахархах өдөр юм.

Түүнчлэн Өвөрхангай аймгаас Зэвсэгт хүчний салбарт 16 генерал төрөн гарсны дотор дэслэгч генерал Ч.Пүрэвдорж, Ц.Дашзэвэг, Ц.Тогоо нарын шилдэг дарга нар Зэвсэгт хүчний Жанжин штабыг 20 гаруй жил удирдан манлайлж байсныг дурсахад таатай байна. Сүүлийн жилүүдэд хүүхэд залууст цэрэг эх орны хүмүүжил олгох олон ажил хийгдэж байгаа бөгөөд улсын аварга шалгаруулах Цэрэг спортын тэмцээнд анх удаа хүрэл медаль хүртсэнд талархаж байгаа илэрхийлье" хэмээн онцоллоо.

 

Баярын хурлаар Цэргийн гавьяаны улаан тугийн одон, Цэргийн хүндэт медаль, Батлан хамгаалах яам болон орон нутгийн шагналыг гардуулж, цэргийн цол нэмсэн алба хаагчдын цолыг гардуулж өгөв.

 

Мөн Монгол цэргийн өдрийг тохиолдуулан цэргийн болон хууль сахиулах байгууллагын алба хаагчдын дунд зохион байгуулсан уралдаан, тэмцээнд багийн нийт дүнгээр манлайлан шалгарсан байгууллагуудад өргөмжлөл, мөнгөн шагнал гардууллаа.