ХӨДӨЛМӨР ЭРХЛЭЛТИЙН АЙМГИЙН ЗӨВЛӨЛ АНХДУГААР ХУРЛАА ХИЙЛЭЭ
Аймгийн Засаг даргын 2025 оны А/165 дугаар захирамжаар “Хөдөлмөр эрхлэлтийн аймгийн зөвлөл”-ийг шинэчлэн байгуулсан.
Хөдөлмөр эрхлэлтийн аймгийн зөвлөл нь 2025 оны анхдугаар хуралдаанаа хийж, дараах асуудлуудыг хэлэлцлээ.
Хурлаар:
- Хөдөлмөр эрхлэлтийг дэмжих чиглэлээр 2025 онд хэрэгжүүлэх үйл ажиллагааны /хөтөлбөр/ танилцуулга
- Цагийн ажлын тогтолцоо буюу орон нутагт цагийн ажлыг бий болгох тухай,
- Хөдөлмөрийн зах зээлийн судалгааны танилцуулга, мэдээлэл
- Хөдөлмөр эрхлэлтийг дэмжих хөтөлбөрүүдийн санхүүгийн дэмжлэг үзүүлэх үйл ажиллагааг олгох тэргүүлэх чиглэл, салбарыг тодорхойлох,
- Мод арчлах, ургуулах арга хэмжээг хэрэгжүүлэх сумдын хуваарь батлах тухай,
- Өвөрхангай аймгийн хөдөлмөр эрхлэлтийн зөвлөлийн 2025 оны ажлын төлөвлөгөөг хэлэлцэн батлах тухай асуудлуудыг тус тус хэлэлцлээ.
Хөдөлмөр эрхлэлтийн аймгийн зөвлөл нь 2020-2024 оны хугацаанд арван удаа хуралдаж, орон нутгийн хөдөлмөр эрхлэлтийг дэмжих бодлого, үйл ажиллагааг удирдан зохицуулах, нийгмийн түншлэгч талуудын оролцоог хангах чиглэлээр томоохон 10 гаруй үйл ажиллагааг удирдан, зөвлөн чиглүүлж ажилласан байна.
Тухайлбал,
- Залуучуудыг хөдөлмөрт бэлтгэх “Оролцоо” төсөлд 141 залууг хамруулсан,
- “Эрсдэлээс сэргийлье” гар утасны апликэйшнийг хэрэглээнд нэвтрүүлэхэд нөлөөлж ажилласан,
- “Тэрбум мод” үндэсний хөдөлгөөний хүрээнд 2022-2024 онуудад 38,5 мянган мод тарьж, 19 сумын 1410 иргэнийг түр ажлын байраар ханган ХЭДС-аас 473,0 сая төгрөгийг ажиллах хүчний зардалд зарцуулахыг шийдвэрлэсэн,
- 2022-2024 онуудад хөдөлмөр эрхлэлтийг дэмжих санд 616 иргэнийг хамруулж, ХЭДС-аас 3,856,000,000 төгрөгийг сумдын хүн ам, зах зээлийн эрэлт хэрэгцээнд нь харгалзан олгохыг шийдвэрлэсэн,
- Аймгийн хөдөлмөрийн зах зээлийн эрэлт, нийлүүлэлтийн судалгаа үр дүнтэй зохион байгуулахад анхаарч ажилласан зэрэг ажлуудыг хэрэгжүүлжээ.
Шинэчлэн байгуулагдсан тус зөвлөлийн даргаар аймгийн Засаг дарга, гишүүдээр аймгийн ЗДТГ-ын Нийгмийн бодлогын хэлтсийн дарга, Хөдөлмөр, халамжийн үйлчилгээний газрын дарга, Хүнс, хөдөө аж ахуйн газрын дарга, Худалдаа аж үйлдвэрийн танхимын Өвөрхангай аймаг дахь салбарын захирал, аймгийн Ажил олгогч эздийн холбооны дарга, Өвөрхангай аймаг дахь Хаан банкны захирал, Арвайхээр сумын Үйлдвэрчний эвлэлийн хорооны дарга, Иргэний Засаглал ТББ-ын тэргүүн, зөвлөлийн нарийн бичгийн даргаар Хөдөлмөр, халамжийн үйлчилгээний газрын Хөдөлмөр эрхлэлтийн хэлтсийн дарга гэсэн бүрэлдэхүүнтэйгээр ажиллаж байна.
2025-03-13 17:23:12
