Төрийн албаны зөвлөлөөс төрийн албаны ерөнхий шалгалттай холбоотой цаг үеийн асуудлаар хэвлэлийн бага хурал хийлээ.
Хэвлэлийн бага хуралд Төрийн албаны зөвлөлийн гишүүн Д.Баатарсайхан, Сонгон шалгаруулалтын газрын даргын албан үүргийг түр орлон гүйцэтгэгч Б.Пүрэвдагва, Маргаан хянан шалгах газрын даргын албан үүргийг түр орлон гүйцэтгэгч Э.Эрдэнэхишиг, Сонгон шалгаруулалтын газрын референт М.Алтанбагана, “Лидер вишн групп” ХХК-ийн захирал Б.Жанчив нар оролцож мэдээлэл хийж, сэтгүүлчдийн сонирхсон асуултад хариултад өглөө.
Төрийн албаны зөвлөлийн гишүүн Д.Баатарсайхан хэвлэлийн бага хурлын үеэр “Төрийн албаны тухай хууль хэрэгжиж эхлээд багагүй хугацаа өнгөрч байгаа. Энэ хуулиар төрийн албаны ерөнхий шалгалт гэж өгдөг болсон. Төрийн албаны шалгалтын бүртгэлийг энэ сарын 1-нээс цахимаар бүртгэсэн. Өнөөдрийн байдлаар 1800 гаруй иргэн бүртгэлд хамрагдсан байна. Энэ нь иргэдийг төрийн албанд шууд томилох шалгалт биш. Ерөнхий шалгалт өгөөд нөөцөд орсон иргэн дараа нь албан тушаалын буюу тусгай шалгалт өгөх чиг үүргийн зохицуулалттай болсон.” хэмээн онцлов.
Ерөнхий шалгалтыг гурван чиглэлээр өгөх бөгөөд эдгээр гурван шалгалт тус бүртээ босго оноотой.
Монгол Улсын нийгэм, эдийн засаг, түүх, соёл, мэдээллийн технологийн мэдлэгийн агуулга багтах бөгөөд энэ шалгалтын үргэлжлэх хугацаа 60 минут байна. Шалгалтын эхний шатанд 35 ба түүнээс дээш оноо авбал тэнцэж, дараагийн шат болох Монгол хэл, Монгол бичгийн шалгалтад орох эрхтэй болно. Харин монгол хэл, бичгийн, крилл бичгийн шалгалтын хугацаа 30 минут үргэлжилнэ. Ерөнхий шалгалтын хоёр дахь шат монгол хэл бичгийн шалгалтад 20 ба түүнээс дээш оноо авч дараагийн Дүн шинжилгээ хийх шалгалтыг өгөх эрхтэй болно. Энэ шалгалт нь 20 минут үргэлжлэх бол сэтгэхүйн чадамжийг үнэлэх шалгалт 10 ба түүнээс дээш оноо авсан иргэн тэнцэж, гурван жилийн хугацаатай нөөцөд бүртгэгдэнэ. Нөөцөд бүртгэгдсэн иргэд тусгай шалгалт /тухайн албан тушаалын / өгч Төрийн жинхэнэ албанд томилогдох боломжтой юм.
Төрийн албаны тухай шинэ хуулийг энэ оны нэгдүгээр сарын 01-нээс эхлэн мөрдөж эхэлсэнтэй холбогдуулан төрийн албанд анх орох иргэдээс Ерөнхий шалгалтыг Төрийн албаны зөвлөлөөс зохион байгуулахаар заасан. Иймээс төрийн албанд анх орох иргэдийн ерөнхий шалгалтын бүртгэлийг 2019 оны аравдугаар сарын 1-30-ны өдрийн 00.00 цаг хүртэл www.csc.gov.mn сайтад цахимаар бүртгүүлж байгаа билээ. Бүртгэл дууссаны дараа Ерөнхий шалгалтыг ирэх арваннэгдүгээр сарын 11-25-ны өдрүүдэд улс орон даяар зохион байгуулна.
