ХУУЛИЙН БАЙГУУЛЛАГУУДЫН УДИРДЛАГУУД ЗӨВЛӨЛДӨЖ БАЙНА
Аймгийн Засаг даргын Тамгын газрын Хууль, эрх зүйн хэлтсээс Хуулийн байгууллагуудын удирдлагуудын уулзалтыг өнөөдөр/2021.01.25/ Нутгийн удирдлагын ордны Сүлд танхимд зохион байгуулж байна. Аймгийн Засаг даргын 2020-2024 оны үйл ажиллагааны хөтөлбөрт гэмт хэргийн гаралтыг бууруулах, урьдчилан сэргийлэх, хуулийн байгууллагууд тэдгээрийн алба хаагчдын ажиллах орчин нөхцөлийг сайжруулахад дэмжлэг үзүүлэх тухай зорилтууд тусгагдсан. Энэ хүрээнд хуулийн байгууллагын төлөөллүүд ажлын уялдаа холбоогоо сайжруулах, хамтран үр дүнтэй ажиллах чиглэлээр уг уулзалт, хэлэлцүүлгийг өрнүүлж байна. Хэлэлцүүлэгт аймгийн Засаг дарга А.Ишдорж, аймгийн Засаг даргын орлогч И.Доржсүрэн, Хууль, эрх зүйн хэлтсийн дарга мэргэжилтнүүд, Шүүх, Прокурорын газар, Цагдаагийн газар, Шүүхийн шийдвэр гүйцэтгэх газар, Шүүхийн шинжилгээний алба, тагнуулын хэлтэс, Мэргэжлийн хяналтын газар, Улсын бүртгэлийн хэлтэс, Хархорин сум дахь Прокурорын газар, Цагдаагийн хэлтэс, Шүүхийн шийдвэр гүйцэтгэх хэлтэс, нээлттэй, хаалттай хорих 423 дугаа анги, Хүний эрхийн үндэсний комиссын аймаг дахь төлөөлөл, Хууль зүйн туслалцааны төв, Гадаадын иргэн харьяатын газрын аймаг дахь төлөөлөл, Монголын өмгөөлөгчдийн холбооны салбар зөвлөл, Монголын Нотариатын аймаг дахь салбарын удирдлага, асуудал хариуцсан мэргэжилтнүүд оролцож байна. Хууль зүйн салбарынхан “Хүний эрх, эрх чөлөөг хүндэтгэх, хамгаалах үйлсийг манлайлах, гэмт хэрэг, зөрчилтэй тэмцэх, урьдчилан сэргийлэх, иргэд, олон нийтийн эрх зүйн боловсролыг дээшлүүлэх, хууль хяналтын байгууллагууд нь үйл ажиллагаагаа уялдуулж, хамтран үр дүнтэй ажиллах” зорилготой “САНАМЖ БИЧИГ”-ийг энэ үеэр байгуулах юм.
2021-01-25 12:34:22
