Төлөвлөсөн ажлаа цаг хугацаанд нь багтаан хэрэгжүүлэх үүрэг өглөө
Аймгийн хэлтэс, агентлагийн дарга нарын шуурхай хуралдаан өнөөдөр цахимаар хуралдлаа. Хурлаар Засаг дарга А.Ишдорж тодорхой үүрэг, чиглэл өгөв. “Ковид-19” цар тахлын халдвараас урьдчилан сэргийлэхийн тулд бүх шатны байгууллагуудын үйл ажиллагааг хязгаарлаж, албан хаагчид хоёр сар орчмын хугацаанд цөөн тоогоор богиносгосон цагаар ажилласан. Энэ нь төрийн ажил цалгардуулах, хойргоших байдал үүсгэж байгаа тул бүх төрийн албан хаагчдыг ажлаа эрчимжүүлэх, төлөвлөсөн ажлаа цаг хугацаанд нь багтаан хэрэгжүүлэхэд онцгой анхаарч ажиллахыг үүрэг болголоо.18-аас дээш насны иргэдийг вакцинжуулах ажил 86.7 хувьтай үргэлжилж байгаа бөгөөд энэ сарын 24-ээс эхлэн ихэнх иргэд вакцины 2 дахь тундаа хамрагдаж эхэлнэ.Мөн зорилтот жилийн ажил, агаарын бохирдлын асуудлаар холбогдох хүмүүст үүрэг, чиглэл өглөө. Дулааны улиралд шахмал түлшээ туршиж, чанар стандартыг шалгаж, айл өрхүүдэд сургалт зохион байгуулж, нөөц бүрдүүлж, ирэх 9 сар гэхэд халаалт, дулааны ажил бүрэн жигдэрсэн, агаарын бохирдлыг тодорхой хувиар бууруулсан байх ёстойг хэллээ. Мөн байгууллага, аж ахуйн нэгжүүдээр явж, тарьж байгаа мод бутыг харж, шалгаж, заавар зөвлөмж өгөхийг аймгийн БОАЖГ-т үүрэг болгов.
2021-05-18 15:12:30
