Төрийн захиргааны албан хаагчид тангараг өргөлөө.
Жил бүр Улс тунхагласны баярыг тохиолдуулан төрийн захиргааны албан хаагчид тангараг өргөдөг уламжлалтай. Өнөөдөр төрийн албаны ерөнхий болон тусгай шалгалтанд тэнцсэн алба хаагчдын төлөөлөл тангараг өргөж, эх орон, ард түмнийхээ төлөө эрдэм чадлаа зориулж, үнэнч шударгаар ажиллахаа тангараглалаа. Шинэхэн төрийн албан хаагчдад хандаж, аймгийн ЗДТГ-ын дарга Ц.Ганболд хэлэхдээ “Та бүхэн эрх зүйн хувьд ажлын байр, албан тушаалаа баталгаажуулж, хуульд заасан нийтлэг эрх, нийгмийн баталгаагаар хангагдах нөхцөл бүрдэж байна. Гэхдээ сэтгэл амарч болохгүй. Мэргэжил, мэдлэгийн хувьд шалгалтаа өгөөд тэнцлээ, одоо ажлын байранд ур чадвар шаардана. Тиймээс богино хугацаанд дадлагажиж, ур чадвараа дээшлүүлж, байнга сурч хөгжих шаардлагатай” хэмээгээд өргөсөн тангарагаа алхам тутамд санаж, төрийн албаны нэр хүндийг өндөрт өргөж ажиллахыг хүссэн юм. Аймгийн Төрийн албаны салбар зөвлөлөөс энэ онд төрийн албаны ерөнхий шалгалтыг хоёр удаа зохион байгуулсан бөгөөд 350 гаруй хүн шалгалт өгч, улмаар төрийн албан хаагчийн нөөцийг 100 гаруй хүнээр нэмэгдүүлээд байна. Мөн тусгай шалгалтыг гурван удаа зохион байгуулж, 60 гаруй шалгуулагч тэнцсэнээс 57 хүн тухайн албан тушаалд томилогдон ажиллаж байна.
2022-11-23 12:20:37
