Улсын хэмжээгээр эрүүл мэндийн салбарт сувилахуйн тусламж үйлчилгээний чанар, аюулгүй байдлыг сайжруулах зорилтыг 2013 онд тавьсан. Энэхүү зорилго, зорилтоо дүгнэн үр дүнг хэлэлцэх зорилго бүхий “Тэргүүний сувилагчдын улсын зөвлөлгөөн”-ийг “Сувилахуйн тусламж үйлчилгээний чанар, аюулгүй байдлыг сайжруулъя” уриан дор Улаанбаатар хотноо амжилттай зохион байгууллаа. Зөвлөлгөөнд нийслэл, орон нутгаас 35 байгууллагын 230 гаруй төлөөлөгч оролцсон ба манай аймгаас ЭМГ-ын мэргэжилтэн С.Дуламсүрэнгээр ахлуулсан Өлзийт сумын ЭМТ-ийн сувилахуйн баг, БОЭТ-ийн МХА-ны ахлах сувилагч Ц.Лхамханд нарын сувилагчид оролцсон юм.

   Зөвлөлгөөнөөр сувилахуйн тусламж үйлчилгээг хөгжүүлэх стратегийн хэрэгжилтийн явц, аймаг орон нутагт хэрэгжүүлж буй үйл ажиллагаа, цаашид анхаарах асуудал хэлэлцэж, ЭМС-ын 2013 оны 82 дугаар тушаал, сувилахуйн тусламж үйлчилгээг хөгжүүлэх стратегийн хэрэгжилт, хариутай албан бичгийн шийдвэрлэлт зэрэг үзүүлэлтийг харгалзан тэргүүлсэн байгууллага, хамт олон, сувилагчдыг ЭМЯ-наас шагнаж урамшууллаа.

    Дээрхи бодлого, шийдвэрийн хүрээнд хэрэгжүүлсэн ажлын тайлан үнэлгээгээр Өвөрхангай аймгийн сувилахуйн тусламж үйлчилгээг хөгжүүлэх чиглэлээр хэрэгжүүлсэн үйл ажиллагаа тэргүүн байрт шалгарч, Өлзийт сумын ЭМТ-ийн 5, БОЭТ-ийн 1 сувилагч БНСУ, ОХУ-д 1-3 сарын хугацаагаар мэргэжил дээшлүүлэх сургалтанд хамрагдах эрхийн бичгээр шагнуулсан юм.

ЭМГ-ын мэргэжилтэн С.Дуламсүрэн