Аймгийн Засаг даргын 2012-2016 онд хэрэгжүүлэх “Бүтээлч-Өвөрхангай” хөтөлбөрт “Өвөрхангай аймгийн боловсролын бахархлыг бий болгож, нийтийн хүртээл болгох” тухай зорилт тусгагдсан. Үүний үндсэн дээр аймгийн ИТХТ-ийн 2014 оны 4 дүгээр сарын 25-ны өдрийн тогтоолоор “Шатар хөтөлбөр”-ийг баталж шатрын спортыг “Өвөрхангайн бахархал” болгон зарласан.

“Шатар хөтөлбөр”-ийг хэрэгжүүлэх ажлын хүрээнд аймгийн Засаг даргын ивээл дор “Шатар-1024” хүүхдийн наадмыг ирэх 9 дүгээр сарын 13-ны өдөр Арвайхээр хотноо зохион байгуулах гэж байна.

Тус хүүхдийн наадам нь аймгийн шатрын спортыг хөгжүүлэх, хүүхэд багачуудын шатрын спортоор хичээллэх дур сонирхлыг нэмэгдүүлэх, урам зориг, хүсэл мөрөөдлийг нь бадраах, тэдний амжилтыг эцэг эх, багш, сурган хүмүүжүүлэгчид, иргэд олон нийтэд түгээн дэлгэрүүлэх гол зорилготой аж.

Энэхүү оюун ухааны тулаанд аймгийн 29 сургуулиас нийт 1024 хүүхэд оролцох бөгөөд улсын аварга шалгаруулах тэмцээний жишгийн дагуу 6 насны ангиллаар өөр хоорондоо өрсөлдөх юм. Үүнд 8 хүртэлх, 9-10, 11-12, 13-14, 15-16, 17-18 гэсэн насны ангиллаар шалгаруулалтыг явуулж, 1024 хүүхдээс шилдгийн шилдэг нэг хүүхдийг тодруулах юм байна.