Их сонголтын өмнө ирээд байгаа төгсөх ангийн сурагчидтай аймгийн Засаг дарга Д.Тогтохсүрэн уулзаж, тэдэнд мэргэжлээ хэрхэн зөв сонгох талаар зөвлөгөө өгч, ярилцлаа. Тэрээр өөрийн сонирхсон, өөрт таалагддаг мэргэжлээ сонгох, сонгосон мэргэжил нь насан туршид ажиллаж, амьдрах баталгаа болсон нарийн мэргэжил байх хэрэгтэй хэмээгээд эзэмшсэн мэргэжлээрээ хийх ажлаа тодорхойлсны дараагаар сонголтоо хийхийг зөвлөв.

Төгсөх ангийн сурагчдын хувьд найз нөхдөө даган дуурайх, сургуулийн нэрийг нь бодож сонголтоо хийх зэрэг түгээмэл алдааг гаргаснаар эзэмшсэн мэргэжил үнэ  цэнэгүй болох, эцэг эхийнхээ мөнгийг үр ашиггүй үрж ажилгүйчүүдийн эгнээг нэмдэг тухай гашуун сургамжийг сануулж энэ алдааг давтахгүй байхыг захилаа.

Түүнчлэн зорилгоо тодорхойлж түүнийгээ биелүүлэхийн тулд үйлдэл хийдэг байх, өдөр тутмын ажлаа төлөвлөж, цаг ашиглаж сурах, аливаа зүйлийг сурахын төлөө санаачлагатай байхыг зөвлөлөө. 

 

2015-04-13 10:47:15